阿懶:遲來的拆蟹好時節

2017-11-29
阿懶
80後平凡OL
 
AAA

craba.jpg
今年內地大閘蟹供港日子更一拖再拖。(大公報資料圖片)

你今年食咗大閘蟹未? 

秋冬是吃蟹的時節,我是蟹迷,每年中秋節後都會相約蟹友「搵靚蟹」開餐,可惜今年內地大閘蟹供港一拖再拖,經過幾次失望而回,一期一會的蟹友聚餐也就沒了影。上星期路過銅鑼灣老三陽,赫見雪櫃內擺放大批大閘蟹,但卻門庭冷落。老三陽是老牌名店,每年大閘蟹季節都人山人海,何解千昐萬昐終於有蟹食,反而無人問津咁出奇蛋? 

一問之下,職員就如苦水缺堤,狂呻話今年被批文玩死,之前好多人致電查詢,但卻供港無期,好多客人都半放棄,以為今年無蟹食,到真的有蟹到,他們已致電熟客通知有蟹到,但一般客人未必「跟得咁貼」,生意自然一落千丈,蟹量少價錢反而平了。此話不假,筆者眼見五兩蟹盛惠$80,以名店標準,確較以往平,當然唔執輸立即通知蟹友開餐。今年對於蟹商來説,確是災難年,老字號如老三陽亦叫苦連天,一些中小型貿易行就更加慘,筆者認識一些行內人,就狂呻血本無歸,寧願唔入蟹避險。 

事實上,近年大閘蟹不時出現抽樣化驗不合格或訛稱來源地,去年部分供港大閘蟹被驗出二噁英含量超標,閙出停售風波。海關及食環署今年就此舉行聯合行動,加強檢查及抽驗,保障市面出售的大閘蟹符合相關法例規定及標準,其中內地大閘蟹,供港日子更一拖再拖,遲遲未放行讓蟹仔來港及出售,甚至要搵日本、台灣大閘蟹「食住先」,可惜價錢貴上一截,味道卻差得遠,難成氣候。 

在港食大閘蟹一波三折,早前去日本旅行,就豪食了一次全蟹宴以解相思,不同蟹不同煮法,螃蟹刺身、蟹肉涮涮鍋,水煮網燒舖滿一枱,仲有笛子手在旁吹《月亮代表我的心》助慶,論排場確是無得輸,不過,對於我來說,不論長腳蟹和帝王蟹,始終不及大閘蟹好滋味,還有一班好友圍燒拆蟹,比拼那個幸運兒手氣好,揀到蟹膏最多的靚蟹,本身已是好玩的遊戲。希望吸取今年教訓,明年不用再望穿秋水,食得安心之餘,供港流程順暢,蟹農蟹商同蟹迷都皆大歡喜就好。 

 

文章只屬作者觀點,不代表本網立場。

延伸閱讀