黎倩蕾:工人做晒未必係好事?

2018-04-06
黎倩蕾
80後平凡OL
 
AAA

maid1.jpg

老友的媽媽70出頭,平時開朗健談,是個友善老友記,近數月不知何故,總記錯時間,晨昏癲倒,即半夜會打電話給阿女,中午會忘了要食飯;而最令人不安的,是開始抗拒沖涼換衫,你一問即反面大怒。老友無計可施,只好趁老人家有兩聲咳,半推半就呃呃騙騙,氹老人家話睇治咳聖手,其實是拜會老人專科醫生,結果一輪評估檢查乜乜乜,醫生話好大可能是認知障礙,不過慶幸仍是初階,不過要進一步檢查才能確認云云。 

近年,有關認知障礙,多了人關注,我對這個病的認識,源自個名。早年叫老人癡呆,後來因為癡呆太負面,就叫腦退化,再後來,又因為認知障礙比較「精準」,名稱就一改再改。顧名思義,認知障礙症非正常老化,而是因患者的腦細胞出現病變而急劇退化及死亡,導致腦功能衰退,影響記憶力、語言能力、視覺空間判斷、執行能力、計算和決策等,以致日常生活、行為及情緒亦受影響。 

本港每10名70歲以上長者,便有1名患者,85歲以上患病比率更高達三分一。認知障礙唔講得笑,但老友引述醫生的「笑話」時,就話好受用,話說醫生半認真半講笑的問老友:你哋屋企有請工人嗎?老友是專業人士又向來父慈子孝,當然大聲答有,仲形容工人猶如老媽子的近身,照顧週到,殊不知阿醫生聞言兩眼微翻,只差在無好似老師在學生份券打個交叉,話老人家和小朋友一樣,工人幫佢做晒,細路易變港童;老人家呢,就易變呆老,統統並非好事。 

老友引述醫生話,上一代阿媽除了少數大戶闊太,一般都會下廚煮幾味,如果老人家平時會下廚,就由她繼續,如果佢鍾意包粉果,千奇唔好因為錫住佢,叫佢唔好咁操勞,皆因「做啲熟悉的手作,係最方便又貼身嘅健腦運動」。自此之後,向來百行孝為先的老友就「返老還童」,上星期說好掛住阿媽牌粉果,今個星期又說想學整家鄕菜茶,仲叫埋家中細路齊齊動手。 

這種三代同堂的親子活動,果然有益有建設性,家有一老的朋友,不妨試試。不用花大錢去跟藍帶名廚學藝,有好嘢食又可承傳又可氹老人家開心同健腦,何樂而不為? 

 

文章只屬作者觀點,不代表本網立場。

延伸閱讀
  • 隨著人口老化和慢性疾病愈趨普遍,香港市民對醫療服務的需求日益增加,為公共醫療系統造成壓力。面對如此挑戰,其中一個應對的方法,便是推動使用中醫治療慢性疾病,加強中西醫協作,為公立醫院分擔部分醫療服務需求。

    政策‧正察  2018-06-15