羅佩怡：咖啡消費
越南可以話係近年最熱門嘅旅遊地點，社交媒體如IG、小紅書等，都有海量嘅越南景點打卡相，經過一連串密集嘅靚相攻擊，終於輪到我初訪胡志明市，收穫都算豐富，確實係平靚正之選，影相控必去的粉紅教堂、胡志明市中央郵政局、聖母教堂、咖啡公寓；喜歡食的有數之不盡，價廉物美的法國餐廳、越南街頭小吃；想要享受，舒筋活絡的有大大小小的按摩店及Spa，泰式日式中式西式按摩包羅萬有，價格、質素比泰國略勝一籌；想要慢活，飲杯嘢嘆返吓嘅，大街小巷都有大量咖啡店俾你揀，工業風、文青風、少女風、西洋風，每間裝潢各具特色，唔怕揀唔啱，只怕你唔夠時間逐間幫襯。
越南係數一數二嘅咖啡出口國，買手信不妨可以考慮咖啡豆或其他咖啡產品，今次去到大手掃貨，一買就買咗幾十包，一班咖啡控朋友收到試飲後評價都幾高，抬得有價值。如果你或你身邊朋友係咖啡控，下次去胡志明市不妨走一轉濱城市場。濱城市場係胡志明市其中一個大型嘅貿易市場，手作工藝、越南紀念品、食品、日用品樣樣都有，當然唔少得咖啡豆，呢個市場有好多越南咖啡豆嘅攤檔，足足有幾條街，雖然每間賣嘅都係大同小異，但價格相差都幾遠，所以要花比較多時間格價同講價，最好嘅當然係揾一個講價達人出手，分分鐘半價都已買到心頭好。
講起咖啡，投資市場中近日亦都係一個火熱話題，因為內地一間新興連鎖咖啡店瑞幸咖啡Luckin coffee 喺5月已於美國上市，首日上市股價急升，公司估值逾50億美元，上市後股價持續波動大，財經新聞廣泛報導。
好多人以神話去形容瑞幸咖啡，仲話係咖啡大哥Starbucks嘅勁敵。瑞幸咖啡成立不夠兩年，開分店速度相當驚人，短短時間已迅速擴張至二千三百多間分店(相當於每5.5小時就開一店），但開得多唔代表賺得多，瑞幸咖啡仍未實現盈利，今年首季淨虧損達5.5億元人民幣！瑞幸嘅燒錢模式都幾「驚人」，例如推廣活動中有首次幫襯，第一杯免費，仲送多張五折優惠券俾你，即係差唔多Starbucks三分一價錢就買到一杯瑞幸咖啡，未飲過，所以不能比較兩者品質。
內地咖啡市場確實有增長潛力，瑞幸咖啡上市文件引述報告指，中國咖啡市場總額由2013年的156億元人民幣，增長至2018年的569億元人民幣，並預計2023年將擴大至1806億元人民幣。但有分析師話按照目前融資水平同補貼情況，瑞幸最多只能再補貼一年半，最終瑞幸係咪可以有錢賺？甚至做到咖啡界一哥？相信呢一刻大家都不敢寄予厚望。
