陳義嵐:曹星如打奧運?係時候檢討港隊遴選機制

2018-12-03
陳義嵐
公共事務顧問
 
AAA

rex1.jpg

「神奇小子」曹星如日前宣布為咗代表香港出戰奧運,決定放棄職業賽嘅排名同豐厚嘅獎金,由職業拳手轉做業餘拳手。呢份甘願自我犧牲嘅獅子山精神雖然好令人敬佩,但依加港隊遴選機制並唔完善,星如參選會唔會隨時演變成之前亞運泳總爭議嘅翻版?

喺講港隊遴選機制之前,要先帶出一個重點──就係幾出色嘅職業拳手都唔一定打得好奧運。外行人一聽「職業拳手轉做業餘拳手」,可能會以為「車,即係你玩哂啦,職業走去打人地業餘!」但咁諗就大錯特錯喇!因為喺拳擊世界入面,職業賽同業餘賽無論喺訓練模式、體重控制、比賽次數等等都好唔同!業餘賽每場回合數目同場與場之間嘅休息時候都比職業賽少,就好似叫個跑開長跑嘅人去跑100米一樣,成個訓練同技巧都已經唔同哂。

講番港隊遴選機制,香港奧運代表選拔其實係由港協暨奧委會會員機構負責, 因為機制唔完善,所以選拔條件同準則一直都俾人感覺唔係好公開透明,咁樣唔單止會影響到付出咗好多努力嘅運動員,同時亦隨時令相關機構蒙冤。

唔知大家仲記唔記得之前亞運游泳隊選拔單嘢?有傳媒報道100米蛙泳時間排名全港第二嘅郭家輝,無故被奧委會否決佢代表香港嘅資格,而取而代之嘅係排第五、泳總委員個仔吳欣鍵(第一名不參加蛙泳單項)。

喺香港呢個講求公平公正、公開透明嘅地方,呢件事隨即被發酵為「黑箱作業」。雖然之後泳總同港協暨奧委會都發聲明,解釋除咗已經入選嘅第三名楊顯皓外,本來係想搵第四名莫啟迪出賽,但因為撞咗佢其他比賽,所以先揀排第五、喺2017年亞洲室內武術運動會攞到唔錯成績嘅吳欣鍵參選。

另外,亦都有消息話郭家輝近排比較少練水,加上佢嘅最佳成績已經係喺兩年前,而佢近年100米公開賽成績甚至唔及吳欣鍵,相信泳總都係唔想二度傷害郭家輝,先唔喺聲明提及呢啲原因。

呢個事例,正正反映咗若果遴選機制唔完善,受苦嘅不但係一心為港爭光嘅運動員,負責提名嘅機構隨時都會成為代罪羔羊,千年道行一朝喪。

講番拳擊,業餘拳手如果要參加奧運,就要由香港拳擊總會揀。當年曹星如為咗轉打職業賽,就冇再做香港拳擊總會會員,加上職業拳擊同業餘拳擊本身就係兩個世界,若果不幸星如不獲提名做奧運代表,大家矛頭又會指向邊個?而喺呢個唔完善嘅機制底下,真相係點真係永遠冇人知。

點都好,曹星如為咗代表香港,無私咁放棄現有嘅名同利重新出發,呢份勇氣同自我犧牲嘅精神絕對值得香港人支持! 但港府亦應該借呢個機會,重新檢討港隊遴選機制,令成件事更陽光化,先唔會抹煞一班運動員嘅努力!

 

文章只屬作者觀點,不代表本網立場。

延伸閱讀
  • 香港的體壇應要發展出一個產業,造就更多與體育、運動相關的產業,從而創造更多的職位空缺,讓有志在體壇發展及退役運動員可以有多一個持續發展事業的機會和平台。

    顏汶羽  2019-07-10